एकछिन अघि भनिरहेकी थिइन्-'मलाई जहिल्यै हाँसिरहन मन पर्छ । जीवन भनेकै हाँसो हो । तपाई विश्वास गर्नुहुन्न होला, म विहान उठ्नेवित्तकै ऐना हेर्छु, राति पनि ऐना हेर्छु । र, ऐनामा आफूलाई हाँसिरहेको हेर्न चाहन्छु । सायद यही गुणले म मिस नेपाल भएकी हुँ ।'   

अन्र्तवार्ताको क्रममा शब्दपिच्छे मुस्कुराहट र करिब ९० प्रतिशत अंग्रेजीमा जवाफ दिइरहेकी नवघोषित 'मिस नेपाल २०१५' इभाना मानन्धरले शैली देखेपछि एकछिन म ट्वाल्ल परेको थिएँ । मनमनै लागेको थियो, वाह् क्या कन्फिडेन्ट रहेछ यिनमा । तपाईका तीन रहस्य के हुन् ? यो प्रश्न र्झन नपाउँदै इभानाले तुरुन्तै जवाफ फर्काइन्, 'मैले अमेरिकामा स्टुडेन्ट अवार्ड जितेको कसैलाई थाह छैन, विजनेश अवार्ड जितेको पनि कसैलाई थाह छैन र मेरो भविष्यमा विजनेश प्रमोशन गर्ने चाहना पनि कसैलाई थाह छैन ।'  

फेरि मैले प्रश्न गरें, तपाईलाई आफ्नो सुन्दर पक्ष के लाग्छ ? उनले गर्वसाथ पुरानै कुरा दोहोर्‍याइन्- 'मेरो मुस्कान । म जहिलै अरुलाई मुस्कान दिएर रिझाउँछु । अनि म मुस्कुराउँदा मेरा दाँतले सबैलाई मोहित गर्छ ।' उनले यसो भनिरहँदा सहकर्मी उद्धव थापा क्लिक-क्लिक तस्बिर लिइरहेका थिए ।   आफ्नो मुस्कान र हाँसोको बारेमा करिब पाँच मिनेटजति उनले वर्णन गरिरहिन् । उद्धवजीलाई अनुरोध गर्दै थिइन्, प्लिज मेरो राम्रो-हँसिलो तस्बिर मात्र हाल्नु होला है.. । तर, इभानाको हँसिलो संसारको वास्तविक रुप धेरैबेर टिक्न सकेन । फिल्मीशैलीमा उनको अनुहारमा हाँसो हरायो । उनले एकाएक आफ्नो रौंद्र रुप देखाउन थालिन् । घरी यता, घरी उता हिड्दै बम्किन थालिन् । भनिन्, 'भिडियो किन खिचेको ? यो डिलिट गरिदिनुस् । खै मोबाइल यता ल्याउनुस् त, म डिलिट गरिदिन्छु ..।'  

भर्खरै मिस नेपाल घोषित इभानासँगको अन्तर्वार्ताको क्रममा यस्तो परिघटना आउला भन्ने मैले सोचेकै थिइनँ । मुलुकको युवतीहरुको एक तप्काको प्रतिनिधित्व गर्ने भएकाले मिस नेपालका धारणाहरु सबैको चासोको विषय हुन् । खासगरी युवा वर्गको प्रतिनिधित्व गर्ने मिस नेपालले युथसँग सम्बन्धित जिज्ञाशाहरु मिस नेपालले मेटाइदेलिन् भन्ने मेरो अपेक्षा थियो ।  अघिल्ला मिस नेपालहरुसँग सौहार्दपूर्ण वातावरणमा कुराकानी गरेकाले इभानासँग पनि सबै विषयमा खुलेर कुरा गर्नुपर्छ भन्ने लागिरहेको थियो । अझ अमेरिकामा पढेर फर्किएकाले उनको खुल्लापन बारेमा स्वभाविक रुपमा अरु मिस नेपालभन्दा बढी आशा थियो । किनभने, अमेरिकी समाजको खुल्लापन र त्यहाँको संस्कारका बारेमा बेला-बेलामा सुन्न पाइन्छ ।  त्यहीबीचमा मैले उनीसँग 'प्रेम के हो ?' भनेर जिज्ञाशा राखें । अघिसम्म मुस्कुराइरहेकी इभाना प्रश्न सुनेपछि नाक खुम्च्याउँदै जवाफ दिइन् । खासगरी, युवा पुस्ता, प्रेम, विवाह र यौनजस्ता विषयहरुमा मिस नेपालका विचारहरु पनि सार्वजनिक चासोका विषयहरु हुन् । मनोरञ्जन अन्तर्वार्तामा त झन यस्ता प्रश्नहरुलाई त फरक सेगमेण्टकै रुपमा प्रस्तुत गर्ने चलन संसारभर छ ।    हरेक मानिसले आफ्नो आइडलबाट सौहार्दता, अनुशासनको आशा गर्छ । मिस नेपालबाट त झन त्यो आशा गरिनु अस्वभाविक होइन । तर, अन्तर्वार्ता नसकिदैं बीचमा इभाना आफ्नो कुर्सीबाट उठिन् । हामीले थप दुई प्रश्नमात्र रहेकाले केही छिनका लागि अन्तर्वार्तामा बसिदिन आग्रह गर्‍यौं । उनी कुर्सीतिर फर्किइन् । त्यही बेला मैले तपाईको बुझाइमा 'सेक्स के हो ?' भनेर सोधें । उनी एकाएक सिटबाट जुरुक्क उठिन् र ढोकातिर गइन ।   'यो एकदम पर्सलन प्रश्न भयो । आइ थिंक दिस इज टु मच । दिस इज इन अफ । महिलाको रेस्पेक्ट गर्न जान्नुस् ।' उनी जोड-जोडले बोल्न थालिन् । त्यसपछि अचानक उनको आँखा मोबाइलमा रेकर्ड भइरहेको भिडियोतर्फ मोडियो ।   

मिस नेपाल बाहिरै सुनिनेगरी कराउन थालेपछि मलाई एकाएक अनौठो लाग्यो । हैन, किन यिनले यति जोड-जोडले बोलिरहेकी छिन् ? ५ मिनेट अघिसम्म हँसिलो अनुहार र मुस्कानको बखान गर्ने यी सुन्दरीको रौद्र रुपमा किन फेरियो ? एकछिन हल्लाखल्ला भएपछि हिडेन ट्रेजरकी प्रमुख कार्यकारी अधिकृत श्वेता सिंह आफै हामी अन्तर्वार्ता गरिरहेको रुमभित्र छिरिन् । उनले घटनाको वास्तविकता जान्ने प्रयास नै गरिनन् । र, उनी पनि ठूलै स्वरमा आदेश दिन थालिन्-'त्यो मोबाइल दिनुस् ।' मैले आफ्नो आइफोन स्वेतालाई दिएँ । उनले आफैं माेवाइल चलाएर भिडियाे अन्र्तवार्ता डिलिट गरिन् ।   

त्यति मात्रले पनि उनको चित्त बुझेन क्यार, अनि मेरो आइफोन चेक गर्न मिस नेपाल इभानालाई थमाइन् । इभाना मेरो मोबाइल सर्च गर्न थालिन । त्यसपछि माहौल यसरी धमिलियो, मानौं मैले उनको अन्तर्वार्ता होइन्, अरु नै भिडियोहरु रेकर्ड गरेर लुकाएको हुँ । त्यसबाहेक इभानाले अडियो रेकर्ड पनि डिलिट गर्न भनिन् ।  

उसो त इभानाको अन्तर्वार्ताकाे समय लिँदा अडियो खिच्ने पाइने कि नपाइने ? भिडियो खिच्न पाइने कि नपाइने ? कस्ता प्रश्न गर्न पाइने ? कस्ता प्रश्न गर्न नपाइने ? नपाइने भन्ने विषयमा हामीलाई कसैले बताएको थिएन । मिस नेपालको अन्तर्वार्ता मिलाउने व्यक्ति तिनै थिइन्, जो सन् १९९९ की मिस नेपाल हुन् । तिनै स्वेता मिडियाकर्मीसँग हुँकारशैलीमा प्रस्तुत भएको देखेर मलाई निकै हृयुमिलियट अनुभूति भयो । पछि इभानाले आफ्नो अन्तर्वार्तासमेत नछाप्न भनिन् ।  

दशक लामो पत्रकारिता जीवनमा सयौं अन्तर्वार्ता गरेँ । अधिकांश राजनीतिक नेताहरु, सेलिब्रेटी, हिरो-हिरोइनहरु, चर्चित खेलाडीहरु ...यस्तै-यस्तै । नेपालीपत्रमा 'फर्केका नेपाली' स्तम्भ लेख्न थालेदेखि त विदेशबाट फर्केर स्वदेशमा उद्यम गरिररहेका दर्जनौं नेपालीको अन्तर्वार्ता गरियो । त्यो क्रम अझै जारी छ । ती मध्ये अधिकांश अन्तर्वार्ता एक्लै लिएको थिएँ ।

तर, बुधबार अपरान्ह एउटा संवाददाताका रुपमा अन्तर्वार्ता लिँदा करिअरकै झुर अनुभव भयो । यो क्षण अहिले पनि लागिरहेको छ, वेक्कारमा यी सोकल्ड सुन्दरीको अन्तर्वार्ता लिन गएछु । १० मिनेटअघि यिनै सुन्दरीले 'वास्तविक सुन्दरता रुपमा हुँदैन, दिल र व्यवहारमा झल्किन्छ' भन्दै थिइन् । साँच्चै लाग्यो, यिनले असली सुन्दरता १० मिनेटमै झल्काइदिइन् । अमेरिकामा बिजनेश पढेर अवार्ड जितेको बताउँने यी सुन्दरीको सुन्दरताको परिभाषाको मुल्य पनि राम्रैसँग बोध गरेकी रहिछन् । धन्य-मिस नेपाल इभाना ।  

साभार : नेपालीपत्र डटकम

प्रस्तुती : जनक तिमिल्सिना