फिल्म ‘अधकट्टी’ को अडियो लञ्च कार्यक्रम नेपाली हिरोइनहरु भेला हुने थलो बन्यो । सोमबार साँझ आयोजित उक्त कार्यक्रममा करिश्मा मानन्धर देखि शिल्पा पोखरेल सम्मका हिरोइनहरु सहभागी थिए ।

फिल्मको एल्बम विमोचन कार्यक्रममा यति धेरै संख्यामा नेपाली हिरोइनहरुको सहभागीता एक थलोमा देखिएको यो पहिलो पटक भन्दा फरक नपर्ला । करिश्मा मानन्धर, झरना थापा, दिपाश्री निरौला, हर्षिका श्रेष्ठ, नम्रता श्रेष्ठ, निता ढुंगाना, ऋचा शर्मा र प्रियंका कार्की ‘अधकट्टी’ को एल्मब विमोचन कार्यक्रममा प्रमुख आकर्षक बने ।

अन्य नायिकाहरुको सहभागीता रहेपनि निर्माण पक्षले यी नौ जना नायिकालाई फिल्मको एल्मब विमोचन गराउँन लगायो । निम्ता पुगेपनि यो आकर्षणमा नायिका रेखा थापा भने बिरामी भएको भन्दै कार्यक्रममा सहभागी भइनन् । जे होस्, प्रस्तुतकर्ता प्रदीप कुमार उदय र संचारकर्मी तथा निर्देशक सुव्रत आचार्य आफ्नो कार्यक्रममा नेपाली हिरोइनलाई एक ठाउँमा भेला पार्न सफल भए ।


एल्बम विमोचनको बाहानामा एक ठाउँमा भेला भएका नेपाली हिरोइनहरु बिच एक आपसमा कस्तो सम्बन्ध छ ? कुन हिरोइन को सँग नजिक छन् ? चाखको विषय पक्कै बन्न सक्छ । ‘अधकट्टी’ को कार्यक्रमलाई नियाल्दा नायिकाद्धय झरना थापा र निता ढुंगाना बिच नजिकको सम्बन्ध रहेको देखियो भने नायिका ऋचा शर्मा एक्ली देखिइन् ।त्यस्तै सदावहार सुन्दरी नायिका करिश्मा मानन्धरले अरु कुनै पनि नायिकासँग आफु निकटतम रहेको देखाइनन् । बरु नायिका प्रियंका कार्कीले सबै नायिकासँग हाइ हलो गर्न भ्याइन् । दिपाश्री निरौला देखि नम्रता श्रेष्ठ सम्ममा प्रियंकाले कानेखुसी गर्न भ्याइन् । 

गत वर्ष देखि मात्रै नेपाली रजतपटमा प्रवेश गरेकी नायिका शिल्पा पोखरेल भने आफ्नी निर्देशक सम्झना रौनियार उप्रेतीको आडमै बसिन् । करिश्मा बाहेकका हिराइनसँग शिल्पाको ‘हाइ हलो’ समेत चलेन् । नायिका हर्षिका श्रेष्ठ कार्यक्रमको हलको अन्तिम तिर अन्य आगन्तुकसँग बसिन् ।