भव्य समारोह बिच सञ्चारकर्मी सुव्रत आचार्य निर्देशित फिल्म ‘अधकट्टी’ को अडियो लञ्च गरिएको छ । सोमबार साँझ राजधानीको एक पार्टी प्यालेसमा नेपाली फिल्म क्षेत्रका ९ जना हिरोइनहरुको हातबाट ‘अधकट्टी’ को अडियो संयुक्त रुपमा विमोचन गरिएको हो । 

हिरोइनहरु करिश्मा मानन्धर, झरना थापा, दिपाश्री निरौला, हर्षिका श्रेष्ठ, नम्रता श्रेष्ठ, निता ढुंगाना, ऋचा शर्मा, प्रियंका कार्की र शिल्पा पोखरेलले ‘अधकट्टी’ को अडियो संयुक्त रुपमा विमोचन गरेका थिए । अडियो विमोचन गर्नेमा प्रस्तुतकर्ता प्रदीप कुमार उदयकी पत्नी पनि हिरोइनहरुको साथमा थिइन् । आउँदो जेठ ८ गते देखि अल नेपाल प्रदर्शनमा आउने फिल्म ‘अधकट्टी’ मा पाँच गीत समावेश छन् जहाँ बसन्त सापकोटा (अतिथि) र राजन इशानले संगीत दिएका छन् ।

आयोजित अडियो विमोचन कार्यक्रममा कलाकारहरु गौरव पहारी, रिस्ता बस्नेत, अशिष्मा नकर्मी र प्रदीप बाँस्तोलाले ‘अधकट्टी’ को गीतमा लाइभ प्रस्तुती दिएका थिए भने नम्रता श्रेष्ठ र विल्सन विक्रम राई प्रस्तुतीको अन्त्यमा सहभागी भए । प्रस्तुतकर्ता प्रदीप कुमार उदयले ‘अधकट्टी’ का गीतहरु श्रोता माझ हिट भैसकेको बताए । यता पहिलो पटक फिल्म निर्देशनमा हात हालेका सञ्चारकर्मी सुव्रत आचार्यले भने कार्यक्रममा उपस्थित आगन्तुको संख्याले आफ्नो फिल्म सुपरहिट बन्ने संकेत मिलेको बताए ।

डार्क कमेडी फिल्म ‘अधकट्टी’ मा विल्सन विक्रम राई, गौरव पहारी, रिस्ता बस्नेत, अशिष्मा नकर्मी, प्रदीप बाँस्तोलाको मुख्य भूमिका रहेको छ भने नायिका नम्रता श्रेष्ठ र नायक गजित विष्टको अतिथि भूमिका रहेको छ ।