फिल्म ‘वडा नम्वर ६’ आउँदो ०७२ सालको  असोज १ गतेबाट सार्वजनिक प्रर्दशनमा आउने भएको छ । असोज अघिका सबै प्रदर्शन मिति ‘प्याक’ भएपछि दिपकराज गिरी, दिपाश्री निरौला र निर्मल शर्माको संयुक्त निर्माण रहेको यो फिल्म दशैंको अगाडी पुगेको हो । उज्जव घिमिरे निर्देशित फिल्म ‘वडा नं ६’ को यतिबेला छायाँकन सकेर पोष्ट प्रोडक्सनको कार्य भैरहेको छ ।

सामाजिक घटनाक्रमसँग जोडिएको फिल्म ‘वडा नं ६’ लाई बैशाख या जेठ महिना भित्र प्रदर्शन गर्ने योजना थियो । तर, सबै प्रदर्शन मिति ‘प्याक’ भएकाले असोजमा पुर्याउनु परेको बाध्यता निर्मात्री दिपाश्री निरौलाले बताइन् । ‘६ एकान ६’ को सफल प्रदर्शन पश्चात् ‘वडा नं ६’ निर्माण गरेका दिपक, दिपा र निर्मल पछिल्लो फिल्मबाट भने प्रदर्शन अगावै लगानी सुरक्षित गर्ने दौडमा छन् । वितरण कम्पनी एफडिले मोफसल वितरणमा ३५ लाख एमजीमा लिएको यो फिल्मको अष्ट्रेलियाको प्रदर्शनाधिकार मोटै रकममा बिक्री भैसकेको छ भने कतार, ओमान, बहराईन, हङ्गकङ्गको लागि पनि कुरा भईरहेको निर्माण युनिटको जानकारी छ । प्रदर्शनसम्म फिल्मको लगानी सत्तरी लाख पुग्ने अनुमान छ । 

अभिमन्यू निरवीको लेखन रहेको फिल्म ‘वडा नं ६’ मा दिपकराज गिरी, प्रियंका कार्की, सिताराम कट्टेल ‘धुर्मुस’, जितु नेपाल ‘मुन्द्रे’, केदार घिमिरे ‘माग्ने बुढा’, अरुणा कार्की, बुद्वि तामाङ्ग लगायतको अभिनय रहेको छ । फिल्ममा सुगम पोख्रेल, बसन्त सापकोटा, राजनराज शिवाकोटी र दिपक शर्माको संगीत रहेको छ । आउँदो वर्ष प्रदर्शन हुने प्रतिक्षित फिल्महरु मध्ये ‘वडा नं ६’ पनि एक हो ।