नेपाली नयाँ वर्ष ०७२ को आगमन पारेर चैत २७ गते तीन नेपाली फिल्महरु प्रदर्शनमा आउँदैछन् । तर, रजतपटमा दुई फिल्महरुको मात्रै चर्चा छ । चैत २७ गते देखि प्रदर्शनमा आउने फिल्म ‘सेतो बाघ’ लाई छोडेर यतिबेला फिल्म बजारमा ‘नाई नभन्नू ल ३’ र ‘हवल्दार सुन्तली’ बिच हुने मैदानको प्रतिस्पर्धालाई लिएर विभिन्न खाले अड्कल बाजी र विश्लेषण हुँदैछन् ।

निर्माता छविराज ओझालाई फिल्म नगरीमा बाघ निर्माताको रुपमा चिनिन्छ । विगत तीन दशक देखि फिल्म निर्माणमा सक्रिय यी बाघ निर्माताको फिल्म ‘हवल्दार सुन्तली’ लाई मुख्य चुनौती भनेको प्रतिस्पर्धी फिल्म ‘नाई नभन्नू ल ३’ नै हो । उसो त निर्माता छविराज ओझा हालसम्मको प्रतिस्पर्धामा विजयी हुँदै आएका छन् । यसै वर्ष पनि कडा प्रतिस्पर्धी फिल्म ‘स्टुपिड मन’ लाई छविको ‘लज्जा’ ले व्यावसायिक रुपमा उछिनेको थियो । तर, यस पटकको प्रतिस्पर्धा भने निर्माता ओझाको लागि ‘फलामको चिउरा चपाए’ सहर हुने फिल्म नगरीमा विश्लेषण हुन थालेको छ । निर्माता ओझाका लागि यस पटकको प्रतिस्पर्धा ‘फलामको चिउरा चपाए’ सरह यसकारण कि, मुख्य प्रतिस्पर्धी ‘नाई नभन्नू ल ३’ कमजोर फिल्म होइन ।

‘नाई नभन्नू ल ३’ व्यावसायिक फिल्म ‘नाई नभन्नू ल २’ को सिक्वेल हो । दर्शक हलसम्म तान्न ‘नाई नभन्नू ल ३’ को नामै काफी छ भन्ने सम्मको विश्लेषण फिल्म बजारमा हुन थालेका छन् । त्यसैले निर्माता छवि ओझाले आफ्नो फिल्मको प्रचार प्रसारमा व्यापकता दिइरहेका छन् । उसो त आफ्नै सहकर्मीबाट बलात्कृत भएकी हवल्दार सुन्तली धामीको चर्चित घटनाबाट प्रभावित भनिएकाले पनि ‘हवल्दार सुन्तली’ लाई नियमितसँगै अफविटका दर्शकले पनि हलमा हेर्न जाने अपेक्षा गरिएको छ । चैत २७ मा नाम चल्ला कि प्रचार भन्ने विषयको बहस यतिबेला फिल्मनरीमा व्याप्त छ । ऋषि लामिछाने निर्देशित फिल्म ‘हवल्दार सुन्तली’ मा किशोर खतिवडा, सविन श्रेष्ठ र शिल्पा पोखरेलको मुख्य भूमिका रहेको छ । 

नामसँगै फिल्म ‘नाई नभन्नू ल ३’ लाई चिनिएका कलाकारको अभिनयले पनि चल्न सक्ने अड्कल गरिएको छ । लेखक एवं निर्माता विकास आचार्यका मुख्य सहायक निर्देशक मुस्कान ढकालले निर्देशन गरेको फिल्म ‘नाई नभन्नू ल ३’ मा आर्यन सिग्देल, प्रियंका कार्की, सुरजसिंह ठकुरी, संचिता लुईटेल, अनुभव रेग्मी, संयम पुरी र आश्मा डिसी लगायतको अभिनय रहेको छ । पारिवारीक प्रेम कथामा यो प्रतिक्षित फिल्ममा बसन्त सापकोटाले संगीत दिएका छन् ।