टंक बुढाथोकी वर्तमान साँगीतिक फिल्म बजारमा ‘नोटिस’ भएका र व्यस्त संगीतकार हुन् । यी युवा संगीतकारले ठूला ब्यानरका रेखा फिल्मस् र छविराज प्रोडक्सनमा दुई र एक गीतमा संगीत सृजना गरेका छन् । रेखा र छविले आफ्नो फिल्मको प्रचार प्रसारमा संगीतकार बुढाथोकीकै गीत संगीतलाई प्रयोगमा ल्याएका छन् । यद्पी एक दर्जन बढी फिल्ममा संगीत दिएका संगीतकार बुढाथोकलाई आफ्नो गीत संगीतमा ‘चोरी’ या ‘प्रभावित’ भएको भन्ने आरोप लाग्ने गरेको छ । यी र यस्तै विषयमा उत्सव रसाइलीले न्यूज पेजथ्री डटकमका लागि युवा संगीतकार टंक बुढाथोकीसँग लामो कुराकानी गरेका छन् । 

तपाईंले सृजना गर्ने गीत तथा संगीत बलिउड र साउथ इन्डियान फिल्मबाट चोरी भयो या प्रभावित भयो भन्ने आरोप लाग्ने गरेको छ नि ? 

नेपाली फिल्मको संगीतमा काम गर्न सुरु गर्दा देखि नै मेरो एउटै उद्धेश्य भनेको नेपाली दर्शक तथा श्रोतालाई नेपाली गीत संगीतमा नचाउनु हो । नेपाली दर्शक तथा श्रोता आज बलिउडका गीतहरुमा नाच्नु पर्ने बाध्यता छ । मैंले यो नहोस् भनेर काम गरिरहेको छु ।  हाम्रा श्रोता दर्शक नै बलिउड र साउथ इन्डियान संगीतबाट प्रभावित हुनुहुन्छ । यसै अनुरुप मैंले पहिलो पटक ‘काली तिम्रो नजरैले गोली मार्यो ढिच्याउँ ढिच्याउँ’ मा साउथ इन्डियन संगीत प्रयोग गरेको थिएँ । जहाँसम्म ‘हवल्दार सुन्तली’ को ‘घन्टी बज्यो’ गीतमा चोरीको कुरा आइरहेको छ, यसलाई चाहिं म संगीत बुझ्ने दर्शक तथा श्रोताले के भन्छु भने राम्रोसँग गीत बजाएर सुन्नुस् । मैंले कुनै एउटा ‘पार्ट’ कहीं कतैबाट पनि कपी गरेको छैन । ‘घन्टी बज्यो’ भन्ने शब्द मलाई रचनाकारले दिनु भएको हो । घन्टी बज्ने तरिका जहाँ पनि एउटै हो । मनमा घन्टी बज्ने होइन, यो त एउटा ‘फिलिङ्स’ मात्रै हो । म यसलाई चोरी भन्दा पनि ‘इम्प्रोभाइज’ भन्छु । राइट ब्रदरको कन्सेप्टलाई लिएर आज जम्बो प्लेन बनाइएको छ । त्यसैले ‘इम्प्राभाइज’ गर्नुलाई म नराम्रो मान्दिंन ।

तर ‘चोरी नै भयो’ भन्ने आरोप छ नि ? 

यो जसले लेख्नु र भन्नु भएको छ म सिधैं भन्छु, उहाँहरुले संगीत बुझ्नु हुन्न । मेरै बुवाले पनि मलाई बाजा बजाउने मान्छेको रुपमा चिन्नु हुन्छ । संगीत सृजना गर्नु भनेको शब्दलाई एउटा भावनामा ढाल्नु हो । मलाई जसले चोरीको आरोप लगाउँदै हुनुहुन्छ मेरो बुवाले संगीतकार भनेको बाजा बजाउने मान्छे भने जस्तै हो । 

आफ्नो साँगीतिक करिअरको यात्रा छोटकरीमा बताइदिनुस् न । 
०६३ सालमा झापाबाट साइन्स पढ्न भनेर काठमाण्डू आएको थिएँ । म कक्षा १ देखि कक्षा १० सम्म प्रथम स्थान हाँसिल गर्ने विद्यार्थी हुँ । त्यसैले मलाई घरबाट डाक्टर या इञ्जिनियर पढ्न भनी साईन्स पढाउन काठमाण्डूमा पठाइएको थियो । माओवादीको जनयुद्धले गर्दा मेरो पढाई राम्रो हुन सकेन । मेरो दाजु टिकाराम बुढाथोकीको पहिलो गीत हेर्ने मौका पाएको थिएँ । त्यतिबेलै मेरो आइएस्सी पनि बिग्रिएको थियो । मलाई लाग्यो भगवानले मेरो बाटो परिवर्तन गरिदिनु भयो । ०६४ सालमा मैंले झापाबाटै एल्बम निकाले । एल्बम एकदमै हिट भएपछि म संगीतमा लाग्ने निधो गरें र लागेपनि । तर, बुवा आमाको करले फेरी मैंले ०६५ सालमा बिर्तामोडमा आइएसी ज्वर्इंन गरें । त्यसपछि म बिएसी पढ्न काठमाण्डूको सेन्जेभियर्स कलेज आएँ । त्यो बेला मैंले हिन्दी फिल्म ‘थ्री इडियट्स हेरेंको थिएँ । त्यो फिल्म हेरेपछि म धेरै रोएँ । आमा बुवाको सपनालाई थाँती राखेर म आफ्नो सपना पूरा गर्ने बाटोमा लागें । एरेञ्जिङ सिकें, टेक्सिनसियन सिकें । हरेक कुरा सिकेर ०६९ सालदेखि साँगीतिक क्षेत्रमा प्रवेश गरें ।

आमा बुवाको सपनालाई छोडेर आफुले रोजेको क्षेत्रमा लाग्दा सजिलो त पक्कै भएन होला ? 

सुरुवातमा मलाई मेरो परिवार र शिक्षाकले समेत राम्रो मान्नु भएन । स्कूलमा पहिलो हुने छोरो, विद्याार्थी डाक्टर, इञ्जिनियर बनोस् भन्ने उहाँहरुको सपना थियो होला । अझ संगीतमा लाग्नेलाई अहिलेसम्म पनि ‘गाईंने’ नै भनिन्छ । तर, पनि मैंले आत्मविश्वास गुमाएर मिहेनत गर्न छोडिंन । घरमा यतिसम्म भएको थियो कि, बुवाले मेरो गितार समेत फुटाइदिनु भएको । त्यतिबेला म धेरै रोएको थिएँ । आमाले मलाई नयाँ गीतार किनिदिनु भयो । पछि दर्शक तथा श्रोताले मन पराएपछि मात्रै आमा बुवाले मलाई पत्याउनु भयो र सहयोग गर्नु भयो । 

अहिले के भन्नुहुन्छ त ? 

मेरो अन्तर्वाता हेर्दा बुवा अहिले रुनु हुन्छ । त्यतिबेला मेरो आँखामा दुःखको आँसु थियो भने अहिले बुवाको आँखामा खुसीको आँसु छ । म अहिले आफ्नै लगानीमा पुतलीसडकमा स्टुडियो खोल्ने तयारीमा छु । बुवाले मलाई डाक्टर इञ्जिनियर पढाउन सुरक्षित गरेर राखेको रकम स्टुडियोमा लगानी गरिदिनु भएको छ ।

यहाँसम्म आउनुको श्रेय कसलाई दिनुहुन्छ ? 

मिहेनत आफ्नो ठाउँमा छ तर मलाई हरेक ठाउँमा सघाउने मेरो दाइ टिकाराम बुढाथोकी हुनुहुन्छ । उहाँले मलाई कहिले पनि असहयोग गर्नु भएन । त्यसैले मेरो सफलताको श्रेय मेरो दाई टिकाराम बुढाथोकीलाई नै दिन्छु । 

संघर्ष गरेर यहाँसम्म आइपुग्नु भएको छ, अहिले चाहिं कस्तो लाग्छ ? 

पहिलो मेरो हिट गीत ‘जञ्जिर’ फिल्मको किन ‘गाह्रो गाह्रो हुन्छ’  हो । ममा यति धेरै लगनशीलता हुन्थ्यो, यो गीत मैंले पुतलीसडकबाट कोटेश्वर हिड्दै गर्दा फुराएको थिएँ । त्यो बेला आफ्नै किसिमको बाध्यता थियो । अहिले नाम चलेका ब्यानरमा काम गर्ने अवसर पाइरहेको छु, यसले पक्कै पनि खुसी दिन्छ । बालुवामा महल बनाउँछु भन्दा भत्किएला तर आफ्नो खुबी अनुसारको मिहेनत गर्ने हो भने एकदिन सफलता पाइन्छ र खुसी मिल्छ भन्ने मलाई लाग्छ । 

तपाईंको संगीतको प्याट्रनको आयु लामो छैन भनिन्छ नि ?

सुरुका दिनमा मैंले ‘इम्प्रोभाइज’ गरिराखेको छु । हाम्रा दर्शक र श्रोतालाई मन पर्छ भनेर मैंले मिहेनत गरिराखेको छु । यति भयो भने त म कसरी कालन्तरसम्म नजाउँला र ? मैंले एउटा मात्रै प्याट्रनलाई प्रयोग गर्न खोजिरहेको छैन । मेरो मेलोडी प्याट्रन पनि राम्रो छ । पहिलो गीत ‘किन गाह्रो गाह्रो हुन्छ’ बाटै मैैंले रेखा फिल्मस्मा संगीत सृजन गर्ने अवसर पाएँ । रेखा दीले (रेखा थापा) ले त्यही गीत सुनेरै मलाई ‘हिम्मतवाली’ मा व्रेक दिनु भएको हो । 

तपाईंलाई ब्यानरले खोज्छ कि तपाईं आफैं ब्यानर खोज्दै जानुहुन्छ ?

‘किन गाह्रो गाह्रो हुन्छ’ चलेपछि काम गर्न आत्मविश्वास बढेको थियो । रेखा फिल्मस्मा काम गर्न ईच्छुक नै थिएँ । म रेखा दीलाई भेट्न आफैं गएको हो । त्यसपछि मैंले अन्य फिल्म र छविराज प्रोडक्सनको ‘हवल्दार सुन्तली’ मा काम गरें । रेखा फिल्मस् बाहेक म एक जनाकोमा पनि काम माग्दै हिंडेको छैन र हिड्नु पनि परेको छैन ।

फिल्म नगरीमा त चाकडी र चापलुसी चल्छ भन्छन् नि ?

रेखा थापा बाहेक मलाई एकजनाले पनि भन्न सक्नु हुंन्न कि ‘टंकले यो गरेर काम पायो’ भनेर । छवि दाईसम्मले मेरो अफिसमा आएर भन्नुभएको छ, ‘मेरो नमस्ते नेपालको अफिसमा जुत्ता चप्पल फुकाल्ने संगीतकार धेरै छन्, म तिम्रो चार तल्लाको अफिसमा आएको छु ।’ मेरो अफिसमा आउँदा उहाँले  ‘तिमी ठूलो मान्छे बन्छौ’ भन्नु भएको छ । 

साँगीतिक बजारको प्रतिस्पर्धामा आफुलाई कुन स्थानमा राख्नुहुन्छ ? 

म त फुच्चे केटा आफुलाई प्रतिस्पर्धामै राख्न चाहन्नं । सबै संगीतकारहरु सिनियर हुनुहुन्छ । म उहाँहरुकै गीत सुनेंर यो क्षेत्रमा आएको हुँ । म दुई वर्ष अगाडीसम्म ‘सिम्पल सिम्पल कान्छीको डिम्पल पर्ने गाला’ गीत गाउँदै हिड्थें । सुरेश दाईको (सुरेश अधिकारी) को गीत गाउँदै हिड्थें, श्म्भूजित दाईको (शम्भूजित बाँस्कोटा) गीतमा नाच्थें । अर्जुन दाई (अर्जुन पोखरेल) राम्रो कम्पोजर हुनुहुन्छ । उहाँहरुको गीत म सुनेंर सिक्थें भने म आज उहाँहरुकै प्रतिस्पर्धी हुँ भनेर भन्दिंन । म त फुच्चे केटा हो । मिहेनत गर्छु । मिहेनतमा विश्वास गर्छु ।