पछिल्लो समय प्रदर्शनमा आइरहेका फिल्महरुले दर्शकलाई हसम्म तान्न सकिरहेका छैनन । यसअर्थ फिल्महरु व्यावसायिक रुपमा फल्प छन् । तर, प्रदर्शनको क्रममा रहेका फिल्मलाई भने न्यूनतम मूल्यमा वितरकले किन्ने प्रथा ‘एमजी’ भने हिट भैरहेको छ । घाटाको बजारमा कुनै पनि फिल्मलाई न्यूनतम मूल्य दिएर वितरणको जिम्मा लिनु सानो जोखिम होइन ।

फिल्म ‘नाईं नभन्नू ल ३’ र ‘वडा नं ६’ लाई वितरकले मोटो रकममा एमजीमा लिएका छन् । चैत २७ गते प्रदर्शन हुने फिल्म ‘नाईं नभन्नू ल ३’ लाई काठमाण्डूमा मात्रै वितरक सुनिल मानन्धरले ३५ लाख रुपैयाँ दिएका छन् । मोफसलका लागि फिल्म ‘वडा नं ६’ लाई वितरक एफडि कम्पनीले पनि ३५ लाख रुपैयाँ नै एमजी दिएको छ । चैत १३ गते प्रदर्शनमा आउने फिल्म ‘भूल भुलैया’ लाई पनि काठमाण्डूका लागि वितरक गोपाल कायस्थले एमजीमा लिएका छन् । काठमाण्डूका लागि मात्रै फिल्म ‘भूल भुलैया’ का निर्मातालाई २५ लाख रुपैयाँ एमजी दिएको वितरक कायस्थको दाबी छ । उनले गीत राम्रो र निर्देशकले मिहेनत गरेकाले फिल्म चल्न सक्ने देखेर ‘भूल भुलैया’ लाई उक्त एमजी रकम दिन आफु तयार भएको बताए ।

एमजीले निर्मातालाई राहत दिएपनि वितरकका लागि भने यो प्रणाली जोखिम हो । फिल्म नचलेको खण्डमा पनि वितरकले निर्मातालाई सम्झौता गरे वमोजिमको रकम उपलब्ध गराउनु पर्ने सर्त छ । फिल्म घाटामा जाँदा वितरक एक्लैले बेहोर्नु पर्छ । एमजी प्रणालीमा फिल्मले कमाएको नाफा भने खर्च कटाएर वितरक र निर्माताले आधा आधा बाँड्नेछन् ।